Larunbaterako antolatu du ekitaldia Gipuzkoako Foru Aldundiak, Geurea ikurrina lelopean. Plaka bat eta ikurrina bat jarriko dituzte Gipuzkoa plazan, diputazioaren eraikinaren ondoan, eta Aldundiak jakinarazi du Inaxio Kortabarria Realeko kapitain ohia izango dela ikurrina igoko duena. Kortabarriak eta Jose Angel Iribarrek atera zuten ikurrina 1976ko abenduan, Atotxako futbol zelaian (Donostia), Realaren eta Athleticen arteko partidan. Orduan debekatua zegoen oraindik ikur hori.
12:30ean izango da ekitaldia, eta bertara joateko deia egin diete herritarrei, ikurrinaren alde eta Espainiako bandera jartzeko agindu judizialaren aurka egiteko. Besteak beste, Andoni Egaña eta Alaia Martin bertsolariek ere hartuko dute parte, eta Martin Garitano ahaldun nagusiaren hitzaldiarekin bukatuko da ekitaldia.
EH Bilduk ere bat egin du Foru Aldundiaren deiarekin; ez, ordea, EAJk. "Ulertezintzat" jo dute diputaziotik alderdi jeltzalearen erabakia.
