Indarra galtzen ari da denboralea

Bihar goiza arte denboralearen eraginpean jarraituko du Euskal Herriko kostaldeak, baina dagoeneko igaro da handiena. Gaur goizeko itsasgoran ere olatu handiak izan dira, baina atzo goizekoak baino dezente txikiagoak; inola ere ez atzoko triskantzak eragiteko modukoak.

Izan ere, aspaldiko kalte handienak eragin zituzten atzo goizaldean batez beste 10 metro hartu zuten olatuek. Donostian bakarrik hamabi milioi euroko kostua duten txikizioak egin dituzte, eta soka luzea da: Donibane Lohizune, Hendaia, Donostia, Orio, Zarautz, Getaria, Zumaia, Deba, Ondarroa, Lekeitio, Bermeo, Bakio... Leku batzuetan gehiago, bestetzuetan gutxiago, ia kostalde guztian utzi du arrastoa denboraleak.