Iruñean, 2016ko sanferminetan emakume baten kontrako taldeko sexu erasoa egin zuten gizonezkoen ibilbide bera egitea proposatu zuenTour de la manada izeneko webgune batek, eta iragarki hori "biktimaren aurkako tratu iragaingarria" izan daitekeela ebatzi du Iruñeko 4. Instrukzio Epaitegiak. Autoan jasotzen duenez, nahikoa zantzu dago epaitzeko ea iragarkiaren egileak biktimaren duintasunaren kontrako delitua egin duen. Horrenbestez, hamar eguneko epea eman die fiskalari eta iragarlea auzipetzeko eskatu duen herri akusazioari, akusazio idatzia aurkeztu ala auzia artxibatzea eskatzeko.
Foruzaingoak ofizioz hasi zuen ikerketa baten ondorioz abiatu da ikerketa judiziala. Epailearen esanetan, ikerketak argi utzi du 2018ko abenduaren 3aren eta 5aren artean auzipetuak iragarki bat argitaratu zuela webgune batean, eta iragarki horrek proposatzen zuela sanferminetako erasotzaileek emakume bat taldean bortxatu zuten gauean egin zuten ibilbide bera egitea. "La Manada taldeko bostek euren argazkirik famatuena egin zuten tokitik, Zezen Plazaren aurrean identifikatu eta atxilotu zituzten tokiraino", zioen iragarkiak.
Iruñeko Udalak eta Nafarroako Gobernuak gogor kritikatu zuten orduan webgunean argitaratutakoa.
Fiskaltzak iragarkia gustu txarreko ekintza dela adierazi duen arren, epaileak ebatzi du biktimaren duintasunaren kontrako delitua izan daitekeela.