Jaizkibelen itsas erreserba babestua eratzea nahi du Eguzkik

Jaizkibel eta Ulia mendien parean itsas erreserba babestua eratzeko eskatu du Eguzki talde ekologistak. Eusko Jaurlaritzako agintariei eta AZTI-Tecnaliako zientzialariei horren aldeko urratsak egiteko eskatu die. Pasaian (Gipuzkoa), Jaizkibel mendiko labarretan eraiki nahi dute kanpoko kaia irmo kritikatu dute, eskari hori egitearekin batera. «Beldurra, presioak eta inposizioak» albora utzi eta egitasmo horren kontra egiteko eskatu dute.

EB Ezker Batuak eta Aralarrek ere egitasmoaren kontra hitz egin dute. Asteazkenean, Pasaiako Portuko Agintaritzak azpiegituraren gaineko Ingurumen Iraunkortasunerako Txostena onartu zuen. Miguel Buen presidenteak egitasmoak izango dituen «ondorio kritikoak» onartu zituen bertan, baina ondorio horiek arintzeko 34 neurri proposatu direla esan zuen. EBk gogor kritikatu duhori, eta ingurumen txostenaren erabilera «gaiztoa» egitea egotzi die Portuko Agintaritzako arduradunei.

Gipuzkoako Batzar Nagusietako Aralarreko eledun Rebeka Uberak ere egitasmoaren kontra hitz egin du. «Iraunkortasun txostenak zerbait erakusten badu, azpiegitura horren iraunkortasun eza erakusten du», ohartarazi du.