Lehen Hezkuntzan hastekoak dira LOMCE hezkuntza erreforma ezartzen irailean. Curriculum berriaren dekretua indarrean jarri du jada Espainiako Gobernuak, eta horren aurka jo zuen auzitara Eusko Jaurlaritzak, uste baitu eskumenak urratzen dizkiola Espainiako Hezkuntza Ministerioaren dekretuak.
Curriculum zentralizatzailea egin du Jose Ignacio Wert ministroak: Espainiako edukiak nabarmen gehiago izango dira, eta erkidegoek eta eskolek aukera gutxiago izango dute edukiak osatzeko, Madrildik oso zehaztuta baitator gaitegia. Horrekin erkidegoen eskumenak urratzen direla uste du Eusko Jaurlaritzak, eta horregatik jo zuen Espainiako Auzitegi Konstituzionalera.
Auzitegiak tramiterako onartu du salaketa hori. Espainiako Gobernuari hogei eguneko epea eman dio bere argudioak aurkezteko.
Helegitea tramiterako onartzeak ez du esan nahi dekretu hori ez denik ezarri beharko irailean Arabako, Bizkaiko eta Gipuzkoako ikastetxeetan. Auzitegiak erabakiko du zer egin.
