Iazko uztailean jo zuen auzitara UPDk. Salaketa hau da: Noticias taldeko hedabideetan publizitatea jarri zuela Eusko Jaurlaritzak, baina publizitatea zela jakinarazi gabe, alegia, albiste modura eman zutela publizitatea. Hiru delitu egotzi zizkion UPDk Iñaki Bernardo Komunikazio zuzendariari: prebarikazioa, diru publikoa bidegabe erabiltzea eta kontratazioan iruzur egitea.
Gorka Maneiro UPDko parlamentariak adierazi du Gasteizko auzitegiak aintzat hartu duela salaketa, eta inputatu egin duela Jaurlaritzako Komunikazio arduraduna. Hark, ondoren, ohar baten bidez, azaldu du "oraingoz" kargua utzi egingo duela, "kasua argitu arte".
Maneirok ohartarazi du salaketa gehiago etor daitezkeela. "Albisteak erosi" egin zituztela salatu du. Dirutan, 230.000 eurorena baino handiagoa da salaketa.
