Ostiral arratsaldean atxilotu zuen Ertzaintzak gizonezko bat, hilda agertu zen emakumearen hilketarekin zerikusia izan dezakeelakoan.
Eusko Jaurlaritzako Segurtasun Sailak jakinarazi duenez, Bilboko herritar batek larrialdi zerbitzuetara hots egin zuen joan den larunbatean, 10:45 aldera, esanaz etxeko sofan aurkitu zuela etzanda, geldirik. Bertara joan ziren osasun zerbitzuak, baina emakumearen heriotza baieztatu besterik ezin izan zuten egin. 51 urte zituen.
Bertara joan ziren ertzainek ikusi zuten gorpuak ubelduak zituela, eta odol arrastoak ahoan. Lurrean ere odol aztarnak zeuden. Horren berri eman zioten Bilboko auzitegi bati, eta auzitegi medikuntzako zerbitzura eraman zuten gorpua. Autopsiak ebatzi du indarkeriaz hil zela andrea.
Ikerketa abiatu zuen Ertzaintzak. Atxilotua andrearen bikotekidea da, eta biktimak salaketak jarri zizkion genero indarkeriagatik. Gizonak 49 urte ditu, eta beste sei aldiz atxilotu dute; horietako batean, hildako emakumea jotzeagatik. 2007ra arte urruntze agindua ezarri zioten, baina agindua kendu ziotenetik biktimak ez zuen salaketa gehiago aurkeztu.
Indarkeria matxistak hildako zazpigarren emakumea da Bilbokoa. Ekainean izan ziren azken hilketak: gizon batek bikotekidea eta bi alaba hil zituen Angelun, eta beste gizonezko batek andre bat hil zuen Gasteizen.
