Eusko Jaurlaritzak “zero tolerantzia” estiloko lege proiektua aurkeztu zuen 2014ko abenduan, adikzioen aurka. Eusko Legebiltzarrak gaia aztergai izan du harrezkero, eta proposamen batzuk bertan behera geratu dira. Gaur egin du lantaldeak azken bilera.
Lege proiektuaren puntu gatazkatsuenetako bat zen kaleko edanarekin lotutakoa. Alkohola soilik tabernetan eta terrazatan kontsumitu ahal izatea zen gobernuaren proposamena. Zalantza handiak sortu zituen asmo horrek; esaterako, taberna alboetan edan ahalko litzatekeen, zein distantziatara arte, piknika egitean ere edan ote litekeen... Jon Darpon Osasun sailburuak iradoki zuen laxo jokatuko luketela: “Legeaz aparte, arau ona izaten da sen ona erabiltzea ere”.
Oposizioak —EH Bilduk eta PSE-EEk— bertan behera utzi du proposamena. EAJk azaldu du saiatu dela “erdibideko” zerbait bilatzen, aitorturik debeku hori gizarteak ez lukeelako “partekatuko”. Ez dute adostasunik lortu, ordea.
Tabakoarekin du lotura beste berritasunak. Oraingo Tabakoaren Legeak airean uzten du elkarte gastronomikoetan erre ote daitekeen edo ez —lokal itxiak aipatzen ditu—. Praktikan, erretzen segitzen dute elkarte gehienetan. Hori amaitzea proposatu zuen gobernuak —berdin elkarte gastronomikoetan eta gazte lokaletan—, erretzea galaraztea. Laxotu egin du araua legebiltzarrak: ezingo da erre, baldin eta bazkideek bozketa bidez ez badute kontrakoa erabakitzen. Hortaz, bazkide gehienak ados badaude, erretzen segituko ahalko da txokoetan. Salbuespena: elkartean adingabeak daudenean, ezin izango da erre.
