10 milioi euroko proiektua du esku artean Seaskak: Etxepare Lizeo berria. Eta ez hori bakarrik, datorren urtean ikastola berria irekiko dute Bokalen eta laugarren kolegioaren proiektua hor dute. Baina, guzti hori aurrera eramateko, beharrezkoa dute laguntza. Horregatik, Euskal Herri guztitik maiatzaren 14an Senperera joateko deia egin dute antolatzaileek.
Egitarau oparoa antolatu dute aurten ere, familia osoarentzat. Haurrentzat gunea izango da mago eta pailazoekin, bazkaritarako lekuak izango dira, bertsolari zein dantzariak... eta baita kontzertuak ere. Besteak beste, aurtengo kantuaren musika egin duen Ken Zazpi taldea, Zea Mays, Anje Duhalde eta Huntzaren kontzertuak izango dira.
Urtero bezala autobus linea zuzenak antolatu dituzte Iparraldeko hainbat txokotatik, eta hegoaldeko hainbat ikastolek ere antolatu dituzte berenak. Autoan joatea erabakitzen duenak, Senpere herritik ere izango ditu autobusak aintzirara.
