Bost enpresatik batek ez du betetzen kontsumitzaileen hizkuntz eskubideei buruz Eusko Jaurlaritzak egindako dekretua, 2008koa. Ondorio hori eman zuen ezagutzera Jaurlaritzak berak iazko otsailean aurkeztutako ikerketak.
EH Bilduk aldatzea nahi du, dekretuak ez duelakoan “balio” euskaldunen eskubideak bermatzeko. Lege proiektu bat aurkeztu du Eusko Legebiltzarrean. Jendaurreko enpresen hizkuntz betebeharrak zehaztea eta erabiltzaileen eskubideak jasotzea du helburu.
Legea "esparru orokorra" dela adierazi du Xabier Isasi legebiltzarkideak. "Gero, aplikazioa zehazteko orduan, dekretu bidez zehaztu beharko da, betiere malgutasunez, inposiziorik gabe, tokian tokiko egoera soziolinguistikoa kontuan hartuta".
Hona legearen atal nagusiak:
1. Idatzizko komunikazioa. Urtebeteko epea izango dute bezeroekiko harremanak euskaraz ere bermatzeko hiru talde hauek: komunikazio operadoreak, energia konpainiak eta finantza erakundeak. Egin ezean, 6.000 euroko isuna lukete. Dendetan eta garraioan ere urtebeteko epea lukete, baina, kasu horretan, ez du isunik proposatu EH Bilduk.
2. Idatzizko harremana. Mailakatzea proposatu dute: 50 langile baino gehiagoko establezimenduek urtebeteko epea lukete zerbitzua euskaraz ere bermatzeko; 5-50 behargin dituztenek, bi urtekoa; eta bost baino gutxiago dituztenek, lau urtekoa.
3. Zigilua. Jendaurrean euskaraz egiteko konpromisoa hartzen duten enpresei Hizkuntza Konpromisoaren Zigilua ematea proposatu du EH Bilduk. Seinaleak, kartelak, katalogoak eta bestelakoak euskaraz jartzea litzateke baldintza.
Lege proposamena atzo aztertu zuen legebiltzarreko mahaiak. Orain iritzia eskatuko diote Eusko Jaurlaritzari, eta ondoren segituko du parlamentuko tramitazioa.
