Kosta Legearen aldaketa «oso sakona» egingo du Espainiako Gobernuak

Espainiako Gobernuak Kosta Legea aldatuko du. Hala iragarri zuen atzo Espainiako Ingurumen ministro Miguel Aries Cañetek. Aldaketa hori «oso sakona» izango da, Cañeteren hitzetan. «Ingurumen babesa murriztu gabe, legearen aldaketa hori hazkunde ekonomikoarekin eta lanpostuen sorrerarekin bateragarria izatea nahi dugu», nabarmendu du Cañetek.

Horretarako, kosten erabileraren inguruko azterketa egingo dute. «Egokitzapen bat egin nahi dugu, hazkunde ekonomikoa eragingo duten jarduerak sustatzeko».

Hain zuzen ere, horiexek izango dira ingurumenari lotutako beste alorretan Espainiako Gobernuak sustatuko dituen politiken ardatza. Hala, lehentasunen artean ingurumen araudia arintzea izango dute. «Izapide administratiboak arindu nahi ditugu, inbertsioentzat oztopo izan ez daitezen. Hala, tramitazio txostenak berrikusi, eta zain dauden ingurumen eraginari buruzko dokumentuak zehaztuko ditugu».

Greenpeacek iragarri du Kosta Legean murrizketaren bat egonez gero mobilizazioak egingo dituela. Kezkaz ikusi dute Espainiako Gobernuaren asmoa.