Unibertsitatean eginiko mahai ingurua izanik, gazteriaren gaia jorratuz ekin diote alkategaiek, eta ondoren mintzatu dira hiriari eta Euskal Herriari lotutako gaiez.
Bizikidetza eta gatazka armatua izan dute hizpide, bertaratutakoen galderei erantzunez. ETA desegiteko eta euskal presoen eskubideak errespetatzeko eskatu du Goiak, eta "bizikidetza lortuz joatea" ezinbestekotzat jo du Izagirrek. Alde horretatik, udal gobernuak azken lau urteetan eginiko lana gogorarazi du, eta aitortu "urteak" behar direla zauriak ixteko.
Gascok erantzun dio alkateari: "Izagirreri entzunda, garbi dut [bakegintzan, biktimen arloan...] ez dela nahikoa egin". Haren esanetan, "terrorismo mota guztiak" izan dira kaltegarriak, eta gaineratu du ez dutela hori hautagai guztiek esaten. "Hiri honetan demokrazia garaian 102 hilketa egin dira", nabarmendu du, ordea, Albisturrek.
Uholdeak, turismoa...
Martutene eta Txomin Eneko uholdeez galdetu diete, halaber. Udalak herritarrekin izandako bilerak hartu ditu gogoan, eta azpimarratu du hemezortzi lan egitekoak direla uholdeei aurre egiteko. Goiak aitortu du Donostiak bizkarra eman diela auzo kaltetu horiei; hala ere, orain udal taldeak "batera" ari direla lanean gaineratu du.
Turismoaz solasean, Goiak "kalitatezko" turismo eredu baten alde egin du, "hirian dirua utziko duena". Gascok, berriz, gastronomia eta merkataritza uztartzea lehenetsi du, horretan Donostia "erreferentea" izan dadin. Donostia 2016ko Kultur Hiriburutza izan du ahotan Izagirrek, eta nabarmendu egitasmo hori ez dela soilik turismoari lotutakoa, "batez ere" kulturaren bitartez integrazioa sustatzeari lotutakoa baizik.