Loiuko aireportuak 6,4 milioi bidaiari hartu ditzake urtean gehienez, eta 2023an 6,3 milioi hartu zituen. Tokiko erakundeek urteak zeramatzaten Loiuko aireportua handitzeko eskatzen, bidaiari kopurua etengabe handitzen ari zelako, eta hau da AENA aireportuen kudeatzaileak Bilboko terminala zabalduko duela ofizialki baieztatzen duen lehen aldia. Maurici Lucena AENAko presidenteak egin zuen, atzo, erakunde horren akziodunen batzarrean.
Loiuko aireportua handitzeko lanak AENAren hurrengo plan estrategikoaren barruan sartzen dira, zeina 2027 eta 2031 bitartean aplikatuko baita. Ez dago zehaztuta noiz hasiko diren lanak, baina epe horretan egingo dira. Proiektua diseinu fasean dago orain; hau da, AENAren zerbitzu teknikoak Loiuko aireportuaren beharrak aztertzen ari dira, instalazio berriek etorkizunean zerbitzu egokia eman dezaten.
Hirugarrenean asmatu
Aurretik izan dira hainbat proiektu Bizkaiko aireportua handitzeko. Lehena Jose Luis Rodriguez Zapateroren gobernuak aurkeztu zuen, baina 2008ko krisi ekonomikoak ezerezean utzi zituen plan horiek. Azkena 2020 hasieran aurkeztu zen. Ordura arteko bidaiari errekorra hautsi ondoren, AENAri garai aproposa iruditu zitzaion aireportua handitzeko, baina COVID-19aren pandemiak zapuztu egin zuen egitasmo hori.
Bi proiektu horietan handitze lan desberdinak proposatzen ziren. 2008koan, 25.000 metro koadroko handitzea aurreikusten zen, aireportuaren bi hegoak handituz. 120 milioi euroren kostua zuen proiektu hark. 2020koan, ordea, aireportuaren ezker hegalaren handitzea besterik ez zuten proposatu, baina eraikin zabalago baten bitartez. Ez zen inoiz argitaratu proiektuaren kostua.
