Bi orduko lanuztea egingo dute maiatzaren 9an, datorren asteko ostegunean, Nafarroako hezkuntzan. Sindikatu gehienek egin dute deia, elkarrekin: LABek, EILASek, CCOOk, CSIFek, ELAk eta UGTk. Hezkuntzan jasaten ari diren murrizketak eta Espainiako Gobernuaren hezkuntza erreforma salatuko dituzte.
Maiatz osorako egutegia atondu dute, eta hilaren 9rako lanuztea dago tartean. Haur eta Lehen Hezkuntzan, arratsaldeko eskolak ez dituzte emango; DBH Derrigorrezko Bigarren Hezkuntzan, Batxilergoan eta Lanbide Heziketan, lanaldiaren azken bi orduetan egingo dute lanuztea —eskola bakoitzaren ordutegiaren arabera, eguerdian edo bazkalondoan—. Egun horretan bertan, 18:00etan, manifestazioa egingo dute, Hezkuntza Departamenduaren egoitzatik abiatuta.
Maiatzaren 9ko lanuzteak bat egingo du Espainiako hezkuntzan deituta dagoen protestarekin. Sindikatuek azaldu dute zuzeneko loturarik ez dutela bi deialdiek, hilabete osorako egutegia dela Nafarroakoa. Ekainerako ere hasita daude protestak antolatzen; kasu horretan, behin-behinekoen lan baldintzak salatuko dituzte. Protestekin batera, eztabaida bat zabaldu nahi dute, Zer nolako Hezkuntza nahi dugu? Hezkuntza komunitate osoan eman behar den eztabaida leloarekin.
