Bilboko EITBko egoitzako langileen aurrean lehen agerraldia egin du Maite Iturbek. Bere zuzendaritza taldearekin batera, langileekin bildu, eta euren burua aurkeztu dute batzar labur batean. EITB denen artean aurrera aterako dutela adierazi die.
Iragan ostegunean izendatu zuen legebiltzarrak Maite Iturbe EITBko zuzendari nagusi. Zuzendaritza berriaren lau urterako erronka nagusia euskarazko ETB1 katea indartzea eta albistegien "profesionaltasunari" eustea dela iragarri zuen. Horretarako, 121 milioi euroko aurrekontua izango du, iaz baino %27 gutxiago.
