Mendekotasuna aitortua duten pertsonek laguntza handiagoa jasoko dute Gipuzkoan, zaintzaileak hartzen badituzte. Diputazioak iragarri du gehienezko laguntzak handitu egingo dituela zaintzaileak hartzea sustatzeko. Hona gehienezko kopuruak: 834 euro mendekotasun larria dutenentzat; 300 euro arina dutenentzat. Foru Aldundiak bi helburu batean egin nahi ditu erabaki horrekin: batetik, mendekotasuna dutenek etxean jarraitu ahal izatea, eta, bestetik, enplegua sortzea. Aurreikuspenen arabera, 600.000 euroko gastua ekarriko du neurriak, eta 163 kontratu egingo dira.
Ander Rodriguez Gizarte Politikako diputatuak eman du erabakiaren berri. Adierazi du ezintasunen bat duten pertsonei laguntzeko bi alorretan ari dela lanean foru aldundia: egoitzak eta eguneko zentroak sustatzen —250 leku gehiago sortu dituzte— eta etxeko laguntza indartzen —zaintzaileak hartzeko laguntzak handituz orain—.
Mendekotasun Legea murrizketen jomugan dagoen garaian iritsi da Gipuzkoako Diputazioaren erabakia. Espainiako Gobernuak %15 murriztu ditu laguntzak, eta legea bera kolokan jarri du, bideragarria ez dela esanda. Osasun Ministerioa aztertzen ari da zein aldaketa egin.
