Arazo iturri izan da erkidegoen arteko mugan bizi diren herritarren osasun zerbitzua. Nafarroaren eta Eusko Jaurlaritzaren artean ere izan ziren gorabeherak aurreko legealdian. Bortzirietako alkateek salatu zuten Iruñera bidaltzen ari zirela gaixoak, nahiz eta ordura arte Irunen eta Donostian ematen zieten zerbitzua, Gipuzkoan.
Horrelako kasuetarako hitzarmena berritu dute Nafarroako Gobernuak eta Eusko Jaurlaritzak. Hiru urterako ituna da. Horren bidez, muga inguruan bizi diren herritarrei zerbitzua bermatuko diete. Nafarroa iparraldeari dagokionez, honako herrietako biztanleek izango dute mediku espezialista Gipuzkoan: Arano, Arantza, Bera, Etxalar, Goizueta, Igantzi eta Lesaka. Araban emango diete zerbitzua Estellerriko herri hauetako biztanleei: Cabredo, Genevilla, Lapoblacion, Marañon eta Meano. Arabako herri hauetako biztanleek Osasunbidera jo ahalko dute: Arraia-Maeztu, Bernedo, Kanpezu, Lagran eta Harana. 13.000 herritar dira.
Elkarlanerako ildo gehiago ere zehaztu dituzte: espezialitate batzuetan, bigarren iritzia jasotzeko aukera izango dute Osakidetzaren pazienteek Osasunbidean, eta alderantziz; laborategiek elkarrekin egingo dituzte jardun batzuk... Zehazki, jaioberrien baheketa programan izango du eragina horrek: Nafarroako osasun zentroetatik bidalitako azterketak Osakidetzako laborategian egingo dituzte.
