Nafarroako Gobernuak jakinarazi duenez, 0 eta 3 urte bitarteko seme-alabak dituzten familientzako laguntza ekonomikoa gaurtik aurrera eskatu ahal izango da, ahal izanez gero telematikoki, edo aurrez aurre, oinarrizko gizarte zerbitzuaren edo dagokion auzoko unitatearen bidez. Epea 2023ko azaroaren 2ra arte egongo da zabalik.
Adingabe bakoitzeko 100 euroko laguntza emango du gobernuak, gehienez urtebetez. Baldintzen artean daude eskaera egiten dutenek Nafarroan bizi izan behar dutela azken sei hilabeteetan, eta familia unitate bakoitzeko 45.000 eurotik beherako errenta eduki behar dutela, diru hori pertsona bakarrak kobratzen badu; aldiz, familia unitatearen diru sarrerak pertsona batenak baino gehiagorenak badira, 70.000 eurotik beherako errenta eduki behar da laguntza jasotzeko. Errentaren muga hori %10 zabalagoa da familia unitatean %33ko edo gehiagoko desgaitasun frogatua duen pertsona bakoitzeko.
Bestalde, laguntza horretatik kanpo geratzen dira bizitzeko gutxieneko diru sarrera edo errenta bermatua edo «antzeko izaterako laguntzak» jasotzen dituzten familiak.
Eskariak aurkezpen hurrenkeraren arabera ebatziko dira, dagokien zenbatekoa agortu arte –10 milioi euro 2023 honetarako— eta ordainketak hilabete osorako egingo dira; hau da, lehen ordainketa jaiotza dataren hurrengo hilabetearen lehenengo egunean egingo da. Gainera, ordainketek atzerako eragina izango dute, baina, jaiotzaren, adopzioaren edo harreraren ebazpena 2023ko urtarrilaren 1a baino lehenago gauzatu bada, laguntza aurtengo urtarriletik aurrera ordainduko da.
