Nafarroako Gobernuko presidenteorde Javier Remirezek egin du iragarpena: beste behin, asteburuetako eta jai egunetako etxeratze agindua ezarri beharra dagoela uste du gobernuak, izurriteari kontra egiteko. Hori dela eta, neurriak beste astebetez indarrean jarrai dezala eskatu diote Nafarroako Auzitegi Nagusiari, hark baitu horretarako eskumena. Oraingoz, arauak ostegunean du iraungitze data.
Neurriak orain arteko ezaugarri berberei eustea da asmoa. Hau da, etxeratze agindua COVID-19aren intzidentzia maila oso handiko udalerrietan izanen da indarrean, larunbatetan, igandeetan, jaiegunetan, usadioz herrietan festak egiten diren egunetan eta festa horien bezperetan. Ordutegiari dagokionez, aginduak 01:00etik 06:00ak arte debekatzen du kalean egotea.
Gaurko prentsaurrekoan, Remirezek nabarmendu du neurria «biziki eraginkorra» gertatzen ari dela. Gainera, gogora ekarri du datozen asteetan Nafarroako herri askotan ospatu ohi direla festak, pandemiarik izan ez denean, eta, beraz, inportantea dela kutsatzeak eteteko prebentzio neurriak ezarrita edukitzea.
