Nafarroako errauste plantak urtean 200 kilo erreko ditu pertsonako

Nafarroan eraiki asmo duten errauste plantak ez du oraindik kokalekurik, baina, Begoña Sanzberro Ingurumen kontseilariak atzo legebiltzarrean jakinarazi zuenez, urtean pertsonako 200 kilo zabor erretzeko kapazitatea izango du. «Kopurua behera egokitu dugu, Europako irizpideetara eta eskatutakora moldatuta».

Abenduan onartutako hondakinen plana «hobetzeko», herritarren parte-hartzeari ateak ireki zizkioten, eta, horren ondorioz, 160 alegazio aurkeztu dizkiote planari. «Plana kentzearen alde eta errauste plantaren kontrako alegazioak besterik ez ditugu baztertu», adierazi zuen Sanzberrok.

Hondakinen planak 213 milioi euroko aurrekontua izango du, hasiera batean aurreikusitakoa baino %8 gutxiago. Parte-hartze prozesuaren ondoren beste aldaketa batzuk ere izango ditu. Hiri hondakinak %10 murriztuko dira, eta paper eta plastikoaren %52 birziklatuko da, besteak beste.