Aiaraldea eskualdeko (Araba) herritarrak gogaituta daude. Eskualdean diren osasun etxeetan eta larrialdi zerbitzuetan sarritan falta dituzte medikuak, eta beste herri batzuetara bideratzen dituzte pazienteak. Kexu agertu dira maiz herritarrak, eta manifestazio jendetsuak egin dituzte osasun arta egokia aldarrikatzeko. Baina orain arte Eusko Jaurlaritzako Osasun Sailak ez du urratsik egin. Horixe salatu dute gaur Laudioko osasun zentroaren atarian bildu diren ehunka lagunek.
Jakinarazi dute kanpaina bat abiatuko dutela osasun sistemaren egoera salatzeko. Kanpainarekin herritarrak animatu nahi dituzte osasun eskubideak urratzen zaizkien aldiro erreklamazioa aurkeztera. Osasun publikoaren murrizketekin herritarrak «kezkatuta eta haserre» daudela jasota gera dadin nahi dute hala, eta, erreklamazio horiekin, osasun publikoak eskualdean duen egoeraren argazki osoa atera nahi dute gero. Kexa horiek bidaltzeko helbide elektroniko bat eta telefono bat martxan jarri dituzte.
«Bizi dugun egoerarekin kezkatuta eta haserre gaude; batez ere osasun zerbitzuetako arduradunek herritarrekiko agertzen duten errespetu faltarekin», adierazi dute agerraldian. Besteak beste, salatu dute Laudioko eta Amurrioko osasun zentroetan eta larrialdi zerbitzuetan familia mediku eta pediatra nahikorik ez dela. Esaterako, joan den martxoaren 27an eta 31n eta apirilaren 1ean ez zen medikurik egon Amurrioko osasun etxean, eta, hango pazienteak Laudioko osasun zentrora bideratu zituztenez, itxaronaldiak bi ordukoak ere izan ziren. Laudioko EAG etengabeko arreta gunea, berriz, medikurik gabe egon zen apirilaren 5ean eta 7an. Gainera, Aiaraldeko herritarrak kexu dira Usansoloko ospitalera joateko garraio publiko eskasa dutelako —hori dute erreferentziazko ospitalea—.