Oskar Matute izango da EBko kritikoen burua biltzarrean

Bihar eta etzi egingo du Ezker Batuak (EB) VII. Biltzar Nagusia, Bilbon, eta, gaur jakin denez, Oskar Matute izango da koalizioko kritikoen burua kongresuan. Eusko legebiltzarkidea da Matute. Javier Madrazo gaurko koordinatzaile nagusia izango da beste hautagaia postu horretarako.

Duñike Agirrezabalaga Donostiako EBko zinegotziak jakinarazi du gaur Matuteren hautagaitza, Euskadi Irratian egindako adierazpenetan. Zuzendaritzaren txostenari osoko emendakina aurkeztu diote, testu alternatiboa eginda. Dena den, "oso zail" ikusten dute irabaztea. "Ustekabea litzateke".

Madrazoren ildoaren politikarekin kritiko dira Matute-eta. "Jaurlaritzako [EAJ-EA-EB] hirukoaren gobernuaren etapari amaiera eman, gure izaera berreskuratu eta lidergoak eta politika egiteko modua sakonetik eraberritu nahi dugu". Hala esan zuten duela zenbait aste hedabideen aurrean Matutek, Agirrezabagak, Angel Bao Eusko Jaurlaritzako Ongizate Sozialeko zuzendaria izandakoak eta Jonathan Martinez Bizkaiko Batzar Nagusietako biltzarkideak.

Haien esanetan, Ezker Batua "agintearen sarean kateatuta" egon da azken urteetan eta horrek haren ezker izaera ahuldu du.

Jaurlaritzan Etxebizitza eta Gizarte Gaietako Sailak aurrerapausoak eman arren -Javier Madrazo da sailburua-, beste hainbat sailetan ez dutela lan ona egin uste dute. "Ez gara gai izan azpiegitura, ingurumen politika edo osasun eta hezkuntza arloko oinarrizko zerbitzuetako erabaki garrantzitsuak baldintzatzeko".