Pastor: «PPk dioena baino konplexuagoa da Bildu legez kanpo uztea»

Jose Antonio Pastor PSE-EEren bozeramailearen ustez, Bildu legez kanpo uztea «PPk proposatu nahi duena baino konplexuagoa izango litzateke». Hori dela eta, Pastorrek PPri eskatu dio «polemika politikoa» ez erabiltzeko hauteskundeetako «arma» gisa.

Gainera, adierazi du Jose Luis Rodriguez Zapatero Espainiako presidenteak ez duela jarri martxan «hauteskundeetako neurririk» eta ez duela pentsatzen «terrorismoa arma politiko gisa» erabiltzea; baina bai, ordea, PPk. Izan ere, Pastorrek azaldu du PPk duela «urte askotatik» erabiltzen duela «terrorismoa arma politiko gisa etengabe». Horrez gain, adierazi du PPrentzat «denak balio» duela PSOEri eraso egiteko.

Hala ere, esan du Bilduk «ausartagoa» izan beharko lukeela ETAri amaitzeko eskatzeko garaian eta Bilduren oraingo jarrerarekin «etsiak hartuta» dagoela. Era berean, azaldu du gustatuko litzaiokeela «pentsatzea» Eusko Jaurlaritzaren agintea amaitu baino lehen ETAk bere amaiera adieraziko duela.

Hori bai, adierazi du «gauza ez dela helburu hori hauteskundeetako helburu gisa finkatzea, baizik eta ETAk aspaldi egin behar zuen bezala desagertzea eta Bilduk ETAri desager dadin eskatzea».