Pirinio Atlantikoetako Departamenduko kontseilariek aho batez eskatu dute Ipar Euskal Herriaren eta Hego Euskal Herriaren arteko mugak irekitzeko. Oraino ere, lau pasabide hetsiak dira: Irun (Gipuzkoa) eta Hendaia (Lapurdi) arteko oinezko zubia, Izpegiko (Baigorri, Nafarroa Beherea) lepoa, Aldudeko (Nafarroa Beherea) pasabidea, eta Larrainekoa (Zuberoa). Annie Poveda eta Iker Elizalde EH Baiko hautetsiek aurkeztu dute mozioa, eta denek onartu dute.
Argudiatu dute muga inguruko herritarrei kalte egiten diela hetsierak, eta, gainera, Schengen espazioaren barnean Frantziari ez dagokiola mugak hestea. Pirinio Atlantikoetako prefetari helarazi diote mozioa.
Irun eta Hendaia arteko oinezko zubia tarte labur batez ireki izanak hautsak harrotu ditu azken egunotan. Frantziako Tourraren karietara ireki ondotik, berehala berriz hetsi zuten. Protesta egin zuten atzo eragileek erabakia salatzeko, eta, egun, beste elkarretaratze bat izanen da zubian, Irungo eta Hendaiako herriko etxeek deituta.
