Zirriborro bat prestatu du Espainiako Barne Ministerioko Segurtasun Idazkaritzak, Efe agentziak zabaldu duenez. Txosten hori ez da behin betikoa, baina, zirriborroaren arabera, istiluen aurkako polizia gehiago nahi ditu Madrilek Araban, Bizkaian, Gipuzkoan eta Nafarroan.
Espainiako Estatuan dauden istiluen aurkako polizia kopurua ez du ugaritu nahi Madrilek, daudenak berregituratu baizik. Hori horrela, zenbait erkidegotan egun baino polizia gutxiago izango lituzkete, eta beste batzuetan, ordea, gehiago. Hego Euskal Herriaz aparte, Katalunian ere ugaritu nahi ditu poliziak Espainiako Barne Ministerioak.
Zirriborroan jasotakoaren arabera, Efe agentziak zabaldutakoaren arabera betiere, liskarren kontrako polizien bi talde leudeke Iruñean —130 polizia—, eta bat Bilbon —65 polizia—; gaur egun baino 45 gehiago, beraz.
Euskal Herria da Europako Batasunean polizia dentsitate handiena duen lurraldea. Zipreren atzetik, Europan polizia kopuru handiena duen herrialdea ere bada. 2011n Eurostatek kaleratutako datuen arabera, 165 biztanleko polizia bat dago Euskal Herrian, hau da, 1.000 biztanleko sei polizia daude.
