Baionako Arte Eskolako 18 urteko ikasle bat ospitalean da atzoko Biarritzeko elkarretaratzeen bukaeran begitartean bildu poliziaren pilota batengatik. Masailezurra hautsirik du, hortz batzuk hautsirik eta matela urraturik, Sud Ouest egunkariak zabaldu duenez. Egun egitekoa zioten ebakuntza.
Baionako Arte Eskolako zuzendaritzak eta irakasleek bere eskolako ikasleari sustenguz agiri bat plazaratu dute: "Ipar Euskal Herriko Goi Arte Eskolak lazduraz eta sumindurarekin jakin du bere ikasleetarik bat larriki zauritua izan dela aurpegian Flash-ball pilota batekin atzoko Biarritzeko manifestaldiaren karietara. Fermuki salatzen dugu poliziaren bortizkeria hori eta gure sustengu osoa erakusten diogu ospitalean den gure ikasleari" dio agiriak.
Bideo bat ere zabaldu da sare sozialetan, zeinetan ikaslea agertzen baita bukaeran begitartea odoletan eta inguruko jendea asaldaturik.
