Portuko lurzoru zati bat Pasaiari itzultzeko eskatu dio Bilduk Espainiari

Pasaiako kaiaren lurzoruaren zati bat udalari itzul diezaiola eskatu dio Gipuzkoako Batzar Nagusietan Bilduk duen taldeak Espainiako Gobernuari. Inko Iriarte batzarkideak esan duenez, «beharrezkoa» da lur horiek herriari itzultzea badia biziberritzen hasteko.

Iriartek nabarmendu du Pasaiako portuak «modernoa, eraginkorra eta Gipuzkoako garapen ekonomikora egokitua» izan behar duela, eta erantsi du kaia Jaizkibel mendiaren magalean egiteko proiektua ez dutela egingo, «ez lehenago, ez geroago». Badiaren biziberritzea «herritarrek aukeratutako parametroetan» egin behar dela ohartarazi du.

Pasaiako eta Bilboko portu agintaritzak batzea proposatu zuen iragan astean EAJk. Hori kritikatu du Iriartek, eta Gipuzkoa «hondamendira» eraman nahi izana egotzi dio EAJri: «800 milioi euro inbertitu nahi zituzten superportuan, 500 milioi errauste plantan, eta diru asko xahutu zuten errepideetan».