Jokin Bildarratz EAJko senatariak eraman du hizkuntz irizpideen gaia Espainiako Senatura. Gipuzkoako udal batzuk ari dira kontratazioetan hizkuntz irizpideak ezartzen, eta horien aurka auzitara jo du Carlos Urkijok, Espainiako Gobernuak EAEn daukan ordezkariak. Salaketa bidegabeak direla ohartarazi du Bildarratzek, eta zerbitzu publikoa euskaraz jasotzeko eskubidea defendatu du.
Rajoyk, ordea, Urkijoren lana goraipatu du. "Legea betetzeko betebeharra du". Gobernuburuak azaldu du euskara eta gaztelania erabiltzeko eskubidea dutela herritarrek, eta inor ezin dela "diskriminatu" hizkuntza bat edo beste erabiltzeagatik. "Eta hori egin dute udal batzuek, gobernu ordezkariaren ustez". Urkijo bere lana egiten ari da, Rajoyren esanetan. "Ez dago euskararen aurkako erasorik edo euskararekiko errespetu faltarik".
Herritarren eskubideak ahotan hartuta defendatu du Rajoyk udalak auzitara eraman izana. "Herritarrek dituzten eskubideak defendatzen ari da [Urkijo]. Herritarren eskubideei kalte egiten zaienean, norbaitek lagundu behar die, norbaitek babestu behar ditu, eta eskubide horiek errespeta daitezen saiatu".
Espainiako Gobernuak berretsi du "legez kanpo" ari direla Gipuzkoako udal batzuk, kontratuetan enpresa batzuk "diskriminatzen". Hala ere, "gustatu edo ez", auzitegiek esaten dutena onartuko dutela esan du Rajoyk.
