Rubalcabaren aldekoak nagusi Euskal Herrian

Otsailaren 3, 4 eta 5ean egingo du 38. Kongresua PSOEk, Sevillan. Alderdiko buruzagitza noren esku geratuko den erabakiko dute han; Jose Luis Rodriguez Zapateroren lekua nork beteko duen; idazkari nagusi berria Alfredo Perez Rubalcaba edo Carme Chacon izango den. Bien arteko lehia izan da nagusi azkenaldian alderdi barruan, eta zenbait lurraldetako kongresuetan liskarrak ere izan dira. Ez dago argi nork irabaziko duen, baina Euskal Herritik botoa ematera joango diren gehien-gehienak Rubalcabaren aldekoak izango dira.

Atzo egin zituzten herrialde bakoitzetik Sevillara joango diren ordezkariak aukeratzeko kongresu gehienak. Euskal Herriari dagokionez, bizkaitarrek izango dute botorik gehien: hamahiru. Nafarrek zortzi boto izango dituzte, gipuzkoarrek sei, eta arabarrek hiru.

Bizkaiko eta Gipuzkoako ordezkariak Rubalcabaren aldekoak izango dira osorik. Araban eta Nafarroan, berriz, bi hautagaien aldeko kideak biltzen dituzten zerrenda adostuak onartu dituzte.

Alderdiko kargu eta aurpegirik ezagun eta esanguratsuenak joango dira PSOEko idazkari berria hautatuko duten kongresura. Bizkaitik, esaterako, Patxi Lopez lehendakariaz gain, Jose Antonio Pastor, Idoia Mendia eta Isabel Zelaa joango dira Sevillara. Baita Begoña Gil, Susana Gonzalez, Melchor Gil, Iñaki Egaña, Mikel Torres, Alfonso Gil, Tontxu Rodriguez, Myriam Frade eta Alexia Castelo ere.

Gipuzkoan, asteartean aukeratu zituzten ordezkariak: Iñaki Arriola, Jesus Egiguren, Miguel Angel Morales, Susana Corcuera, Rafaela Romero eta Arritxu Marañon.

Araban, ez zegoen hautagaia aukeratzeko irizpide bateraturik, eta, azkenik, bi ildoen artean adostuta, Rubalcabaren aldeko Txarli Prieto zein Gloria Sanchez eta Chaconen aldeko Juan Carlos Alonso joango dira Sevillara.

Nafarroan ere ados jarri dira bi korronteen artean, eta bi hautagaien aldeko ordezkari bana izango da PSNren ordezkarien zerrendaburu: Chaconen taldeko Roberto Jimenez eta Rubalcabaren bozeramaile Juan Moscoso. Maria Isabel Carcavilla, Miguel Angel Anzizar, Susana Perez, Maria Concepcion Perez, Fernando Puras eta Marta Maria Ulrichek osatzen dute zerrenda.