Gero eta zailagoa dirudi konfinamenduaren saihesteak, Eusko Jaurlaritzako Osasun sailburu Gotzone Sagarduiren esanetan. Hala eta guztiz ere, sailburuak nabarmendu du badirela aukera gehiago neurri horri ezarri behar aurretik, eta, horretarako, indarrean diren neurriak betetzeko eskatu die herritarrei. Sailburuak adierazi du birusaren transmisioa «azkar» ari dela hazten, eta onartu du horrek isla zuzena duela ZIUetako okupazioan ere.
Hain zuzen ere, Sagarduik esan du «tentsioa» dagoela ospitaleetan, baina azpimarratu du herritarrentzako arreta bermatua dagoela oraindik ere. Dena dela, onartu du egoera larria dela oraintxe bertan: «Bizi Berri planaren arabera izan ditzakegun ZIU oheen aurreikuspenen bigarren estadioan gaude oraindik. 3. estadiotik hurbil gaude, eta, ziurrenik, goranzko joerari eutsiko dio ZIU behar duten pertsonen kopuruak», adierazi du Sagarduik. Halaber, esan du, birusaren intzidentzia tasa handia dela-eta, ospitale batzuk estuago daudela, baina argitu du ez dela jarduerarik gelditu bertan behera.
Sailburuaren arabera, oraindik ere luze itxaron beharko da txertoa ailegatu arte, eta, hori horrela, esan du gizarteak ezinbestean ikasi beharko duela «birusarekin bizitzen». Elkartasunez eta seriotasunez jokatzea galdegin die herritarrei. «Ez naiz nekatuko hau errepikatzeaz: denek egin ditzakegu ekarpenak birusaren hedapena gelditzeko».