Sagrario Aleman eta Joseba Lakarra, euskaltzain oso

Sagrario Aleman (argazkian) eta Joseba Lakarra euskaltzain oso izango dira, hala erabaki baitu gaur Euskaltzaindiak Bilbon egin duen osoko bilkuran, euskaltzainen artean gehiengo osoa lortu ondoren.

Apirilaren 20an Euskaltzaindiak Etxalarren (Nafarroa) egin zuen osoko bilkuran atera ziren Alemanen eta Lakarraren proposamenak mahai gainera, 27. eta 28. zenbaki-hutsarteak betetzeko. Hain zuzen, 27. zenbaki-hutsarterako, Patxi Zabaleta, Patxi Salaberri eta Andres Iñigok proposatu zuten Aleman; 28. zenbaki-hutsarterako, berriz, Jose Antonio Arana Martija, Xabier Kintana eta Jose Luis Lizundiak proposatu zuten Lakarra.

Orain ikusi egin behar noiz egingo dituzten kargu-hartze ekitaldiak.

Sagrario Aleman



Astiz Etxalekun (Nafarroa) sortu zen Sagrario Aleman, 1952ko martxoaren 5ean. Farmazian lizentziatua da Madrilgo Unibertsitate Konplutensean. 1972an hasi zen lanean helduen euskalduntzean Nafarroan. 1981-82 ikasturtetik aurrera Arturo Campion Iruñeko euskaltegian dihardu, eta zuzendaria da 1982tik. Didaktikan ere dihardu, euskaltegian bertan, beste lankide zenbaitekin.

Ikastaro, mintegi eta jardunaldi ugaritan ibili da irakasle, soziolinguistikaz, didaktikaz eta gramatikaz, besteak beste. Euskal Herrian Euskaraz taldeko partaidea izan zen lehenengo urteetan, eta Zaldiko-Maldiko Iruñeko euskara elkarteko sortzailea ere bada. Horrezaz gain, Euskalerria Irratiaren hastapenetan ibili zen.

Hainbat hedabidetan kolaboratzaile izan da. Eusko Jaurlaritzako Euskararen Aholku Batzordeko kide izan zen joan den legealdian. EKB eta Kontseiluan ere aritua IKAren izenean. Zaldiko-Maldiko elkarteak Lamien Urrezko Orrazia eman zion 1987an, eta 1996an Euskalerria Irratiaren Larreko saria jaso zuen. Euskaltzaindiak euskaltzain urgazle izendatu zuen 2006an.

Joseba Lakarra

Arratzun (Bizkaia) jaio zen Joseba Lakarra, 1962ko urtarrilaren 1ean. Euskal Filologian lizentziatu zen EHUn, 1994an doktore maila lortu zuen, XVIII. Mendeko Hiztegigintzaren Etorkiez izeneko tesiarekin. 1996an, Doktoregoko Sari Berezia jaso zuen.

2005eko abuztutik aurrera Euskararen Historia eta Euskararen Gramatika Historikoaren katedraduna da, EHUko Filologia eta Geografia-Historia Fakultatean; Hizkuntzalaritza eta Euskal Ikasketak sailean dihardu. Bere ikerketa lerro nagusiak hauek dira: euskararen historia eta historiaurrea, eta euskal testu zaharren edizio eta analisia.

Argitaratu dituen liburuen artean, besteak beste: Euskal Baladak. Azterketa eta Euskal Baladak. Antologia (1983), K. Mitxelenaren idazlan guztiak. Hizkuntzalaritza (1988), Manuel Larramendi. Euskal Testuak (1990, Patxi Altunarekin batera), Martin Harrieten hiztegiak (1741) (1995), Towards a history of Basque language (1995, J. I. Hualde eta Larry Traskekin batera), Studies on Basque and Historical Linguistics in honor to R. L. Trask - Ikerketak Euskalaritzaz eta Hiskuntzalaritza Historikoaz. Larry Trasken Oroitzapenetan (2006, J. I. Hualderekin batera).

Fontes Linguae Vasconum-en zuzendaritza batzordeko kidea da. 1988 eta 2000. urteen bitartean Eusko Jaurlaritzak finantzatu eta Euskal Idazleen Elkarteak argitaratutako Euskal Klasikoak bildumaren koordinatzaile izan zen, Patxi Altuna, Ibon Sarasola eta Blanca Urgellekin batera. Euskeraren Iker Atalak / Litterae Vasconicae-ren batzordeko kide ere izana da.

Unibertsitatean ere hainbat kargu akademiko bete ditu; besteak beste, Filologia eta Geografia-Historia Fakultateko dekanoa izan zen, 2003tik 2007ko urtarrilaren bitartean.

Euskaltzaindiak euskaltzain urgazle izendatu zuen 1991n.