Larunbatean milaka lagunek manifestazio hunkigarria egin zuten Xabier Reyren heriotza salatzeko. Gaur, berriz, bi puntuko adierazpena babestu dute Geroa Baik, EH Bilduk, Ahal Dugu-k eta Ezkerrak. UPNk eta PPk aurka bozkatu dute, eta PSNk, lehen puntuan aurka bozkatu badu ere bigarrengoan alde egin du.
Lehen puntuan, "Nafarroako Parlamentuak adierazten du ez dagoela ados egungo espetxe politikarekin", presoak urruntzen dituelako eta eta isolamenduaren moduko salbuespenezko neurriak ezarri. Bigarren puntuak dio "beste espetxe politika bat" behar dela presoek euren zigorra lagunartetik eta familiatik urrun dauden tokietan iragan ez dezaten, eta "familiarekin harremana erraztu asmoz".
EH Bilduko Adolfo Araizen, ustez, Xabier Reyren "heriotza lazgarria ekidin zitekeen". "Ezaguna ez bazen ere, ongi aski ikusi dugu espetxe politika krudel honek dituen ondorioak, bada garaia horrekin amaitzeko eta PP mugiarazteko". Araizek espero du gaur onartutako adierazpena "abiapuntu bat" izatea.
