2019ko apirilean, Donostiako dantzaleku baten kanpoaldean hasitako jipoiaren ondorioz, 17 urteko adingabe bat hil zen —Santi Coca—. Lau urte pasa geroago, azkenik Gipuzkoako Probintzia Auzitegiak hiru urte eta erdiko espetxe zigorra ezarri dio kolpeen egile gisa identifikatutako pertsonetako bati. Zuhurtziagabekeriazko giza hilketa delitua egotzi dio.
Epaiaren arabera, gaztearen gurasoei 72.438 euroko kalte ordaina ordaintzera behartuko dute, eta anaiari, 20.696 eurokoa.
Epaiketa horretan auzipetutako beste lau pertsonak errugabetzat jo ditu epaitegiak. Haietako bati akusazioa kendu egin zioten epaiketan, eta beste hirurak «ez-errudun» deklaratu ditu epaimahaiak.
2019ko apirilaren 26ko goizaldean gertatu zen erasoa, Donostia erdialdeko dantzaleku baten atarian, Nautico eta udaletxearen artean. Zigarreta bat ote zuen galdetuta hasi zen borroka, eta, haren ondorioz, Santi Coca gaztea larri zauritu zen. Egun hartako lekukotzen arabera, gaztea lurrera erori zen, eta ostikoka jardun zioten. Bi egun egin zituen larri, eta apirilaren 28an zendu zen.
Zazpi lagun atxilotu zituzten, 18 eta 25 urte artekoak. Iazko martxoan zen hastekoa epaiketa. Sei auzipetu zeuden, baina atzeratu egin zen auzi saioa, akusatuetako batek ihes egin zuelako. Azaroaren 17an ekin zitzaion epaiketari, eta abenduaren 5ean amaitu zen. Hilabete bat geroago etorri da epaia.
