Joseba Azkarraga eta Luis Galdos Sareko ordezkariek agerraldia egin dute gaur goizean Eusko Legebiltzarreko Giza Eskubideen Batzordean, gaitz larriak dituzten presoen muturreko egoeraren berri emateko. Sarek legebiltzarrari eskatu dio engaiatu dadin eri dauden presoen egoeraren konponbidearekin, eta salatu dezala, adierazpen baten bidez, gaixotasun larriak dituzten presoak espetxean jarraitzea.
Sareko ordezkariak gaitzetsi dute Espetxe Zuzendaritzaren azken agiria "heriotz zigorra" dela gaitz larriak dituzten presoentzat, eta beharrezkoa dela instituzioak haren aurka agertzea. Agiri horretan jasotzen denez, gaixo dauden presoak aske gera daitezke "beren heriotza ziurtasunez aurreikusten bada oso epe motzera, edo hirugarren gradua edo baldintzapean aske geratzea lortzeko baldintzak betetzen badituzte".
Espainiako Gobernuarentzat, bizitza arrisku agerikoan dago presoa bi hilabeteko epean hil daitekeenean. Azkarragak kritikatu du Madrilek araua "bihurritu" egin duela eta modu "krudelean" interpretatu duela. "Ikuspuntu gizatiar batetik ez da etikoa", azpimarratu du.
PPk izan ezik, gainerako taldeek bat egin dute eri dauden presoak aske uzteko eskaerarekin. Sakabanaketa politika eta "salbuespen legedia" bertan behera uztearen alde agertu dira EAJ eta EH Bildu. PSEk, berriz, espetxe politika "garai berrietara egokitzearen" alde egin du. PPk, ostera, kritikatu egin du legebiltzarrak justiziari "presioa" egitea.
