Segiko kide izatea eta lehergailu bat jartzea ukatu dute epaituek

Segi gazte erakundeko kide izatea eta 2009an Bilboko banku batean lehergailu bat jartzea ukatu zuten atzo Alberto Marin Etxebarriak, Alexander Bustinduyk eta Gaizka Astorkizagak Espainiako Auzitegi Nazionalean.

Defentsaren galderei erantzunez, ezeztatu egin zituzten fiskalaren behin behineko agirian agertzen diren akusazioak. Hala, Marinek onartu egin zuen euskal presoekin harremana duela, bera ere preso egon zelako; 2002anETAri laguntza eman izana egotzita.

Horrez gain, Bustinduyrekin Vietnam eta Kanputxean egon zela baieztatu zuen, eta «hoteletan eskaintzen duten irteera batean tiroak bota eta tanke eta armekin argazkiak atera» zituztela, baina nabarmendu zuen hori ez zela «inongo entrenamendurik».

Bustinduyk azaldu zuen ustez lehergaia jartzeko erabili zen autoa tailerrean zegoela, aurrekoan istripua izan zuelako. Venezuelako pasaportea han jaioa izateagatik duela azaldu zuen, eta herritartasun bikoitza duela. Astorkizagak lehergaia jarri zen gauean lanean zegoela ziurtatu zuen.

Bihar jarraituko du epaiketak froga dokumentalekin. Fiskalak 19 urteko kartzela zigor eskaera egin du.