Tiroak istripuz ihes egin ziola erakutsi du Gereñun hilotz aurkitutako ehiztariaren autopsiak

54 urte G.H.I. Gasteizko bizilaguna hilotz aurkitu zuten atzo Gereñun (Araba), familiaren etxaldetik hurbil dagoen paraje batean. Ehizeko txakurrek inguratzen zuten eta tiroa zeukan lepoan. Autopsiak erakutsi du istripuz bere eskopetatik tiroak alde egin eta jo zuela. Hilketaren hipotesia hasieratik baztertu zuen Ertzaintzak, baina istripuz hil zen edo bere buruaz beste egin zuen ari ziren ikertzen. Esan bezala, istripua izan zela frogatu du autopsiak.

G.H.I. Gasteizen bizi zen, baina Nafarroan, emaztearen herrian, zegoen oporretan. Atzo goizean, ordea, Gereñura joan zen, bi anaia han bizi baitira, eta haiekin ehizera joateko. Etxaldean abereekin lanean ari zen anaietako batek entzun zuen G.H.I. nola iritsi zen, eta etxaldean gordetzen zituen ehizeko zakurrak hartuta nola abiatzen zen. Handik gutxira haren bila atera zen beste anaiak hilda aurkitu zuen,etxalde inguruko pareje batean, txakurrek inguratuta. Ahuspez zegoen eta tiroa zuen lepoan.