Tuteran 15 urteko mutiko bat zendu da, bizikletan zihoala auto batek botata

Lagunekin bizikletan zihoala, auto batek harrapatu, eta 15 urteko mutiko bat hil egin da Tuteran, Nafarroan. Herenegun gauean izan zuten ezbeharra, 23:00 aldera. Hiru gazteak bizikletan zihoazen Tutera eta Fitero arteko errepidean, ilaran, eta auto batek harrapatu egin zituen. Ilaran azkeneko zihoan hildako gaztea, eta hark izan zituen zauri larrienak; erietxera eraman zuten, Iruñera, eta atzo hil zen han, Nafarroako Gobernuak jakinarazi duenez. Harekin batera zihoazen beste bi gazteak ere zauritu ziren ezbeharrean; 14 urte dituzte. Ospitalera eraman zituzten haiek ere, Tuterara; zauri arinak dauzkate, nolanahi ere. Ibilgailuko gidariak ez zuen minik hartu. Foruzaingoak ikerketa hasi du zer gertatu zen argitzeko.