Hain zuzen, Gipuzkoako Diputazioak herenegun eman zion Jaurlaritzari bere jarreraren berri. Guztira, 700 milioi euroko kostua du Euskotreneko Gipuzkoako korridorea berritzeak, eta Jaurlaritzak gastuen erdia bere gain hartzeko eskatu dio.
Diputazioak gogorarazi du trenbideen eskumena Eusko Jaurlaritzarena dela soilik, hala ere, finantzaketan laguntzeko «prest» dago. Baldintzak jarri ditu, ordea, eta argi utzi du metroaren honako lanetarako jarriko duela dirua soilik, hau da: Donostian trena lurperatzeko egitasmorako, Altzako lotura egiteko eta Irun eta Hondarribia arteko zatia egiteko -aireportuan geltokia aurreikusten du-. Euskotren XXI Planean jasotako beste proiektuetarako ez du jarriko dirurik, hau da: Donostiatik Eibarrera eta Donostiatik Irunera arteko trenbideak bikoizteko lanetarako.
Beste baldintza bat ere jarri du diputazioak: Donostiako, Irungo eta Hondarribiko udalek metroaren finantzaketan parte hartzea, «metroa eraikitzeak eragin dezakeen lurraldearen berrantolaketaren ondorioz gainbalioren bat lor dezaketelako udal horiek».
Bestalde, oinarrizko datu batzuren «falta» sumatu du diputazioak, hala nola eskariaren inguruko azterketa, bideragarritasun azterketa, proiektu jakinak argitzea eta aurrekontuko diru sailak bereiztea.
Jaurlaritzaren argipenak
Atzo bertan erantzun zion Iñaki Arriola Garraio sailburuak Gipuzkoako Diputazioari, Odon Elorza Donostiako alkatearekin batera egindako agerraldian. Metroa finantzatzeko hirugarren zirriborroari diputazioak emandako erantzuna «ontzat» jo du sailburuak. Bi erakundeek irailean sinatu zuten elkarlanerako akordioa.
Arriolaren arabera, Donostia aldeko metroa proiektu «estrategikoa eta ezinbestekoa» da Gipuzkoarako, eta ezin da gehiago atzeratu. «Ordua iritsi da hitzetatik ekintzetara pasatzeko, eta erakundeok konpromiso sendoak hartu behar ditugu, zalantzarik gabe aurrera egiteko». Bidenabar, hainbat kontu argitzeko baliatu du agerraldia, hala nola Jaurlaritzak ez diola eskatu inoiz diputazioari Euskotreneko Eibar eta Irun aldeko bikoizketa lanetan laguntzeko. Arriolaren arabera, soilik Donostia aldeko metroaren egitasmoan laguntzeko eskatu dio, hots, Lasarte-Oria eta Hondarribia lotuko dituen proiektuan. Proiektu horrekin gipuzkoarren %65en garraio arazoak konponduko lirateke zuzenean, sailburuaren esanetan.
Hala, Jaurlaritzak ez du «arazorik» diputazioak planteatutako «gidoiaren zati bat» bere egiteko, baina udalek proiektuaren finantzaketan parte hartzeko jarritako baldintzarekin ez dago ados. Dena dela, finantzaketari dagozkion «konpromisoetan aurrera egiteko» gunea Gipuzkoako Garraio Agintaritza dela uste du Arriolak, diputazioak berak proposatu bezala.
Odon Elorzaren eskaerak
Odon Elorza Donostiako alkatearen ustez, ezinbestekoa da Gipuzkoako Diputazioak eta Eusko Jaurlaritzak Donostia aldeko metroa finantzatzeko hitzarmen bat lortzea. «Lehen mailako helburu estrategikoa da, hainbat zalantza eta galdera argitzeko» azaldu du. Horren haritik, alkateak espero du diputazioak asteazkenean igorritako erantzuna behin betiko konpromisoa lortzeko «aperitiboa» izatea. Halaber, Elorzak gaineratu du ez dagokiela udalei lan horietako finantzaketan laguntzea eta ez duela «inolako asmorik» gainbalioren bat lortzeko.
