Araba, Bizkai eta Gipuzkoako Haurreskoletako Partzuergoko langileek urriaren 6rako (osteguna) greba iragarri dute gaur, Eusko Jaurlaritzaren murrizketak direla eta.
Haien arabera, murrizketak "handiak" izan dira. Besteak beste, soldatak jaitsi dizkiete langileei, lan baldintzak okertu egin dira, lekualdatzeak gertatu dira, bajak ez dituzte ordezkatu eta hezitzaile kopurua jaitsi egin da. Horrek denak "haurreskolen funtzionamenduan eta kalitatean eragina" izan duela azaldu dute.
Gainera, "haurreskolen hedapenerako plana geldituta" dagoela jakinarazi dute; bai eskola kopuruarena, bai eskoletako gela kopuruarena.
