Espainiako Auzitegi Nazionalean deklarazioa hartu ostean, kartzelara bidali dituzte ustez Izurdia ontziari eraso egin zioten sei pirata. Urriaren 10ean, eraso bat jasan zuela salatu zuen Izurdia atunontziak. Somaliako itsasertzetik 350 bat miliara gertatu zen erasoa.
Orduan atxilotu zituzten sei lagun, eta erasoa egitea leporatu zieten. Izurdia-ko zaintzaile armatuek tiroka uxatu zituzten.
Javier Gomez Bermudez epaileak pirateria delitu bat egotzi die, gaur sei lagunei deklarazioa hartu ostean, eta espetxeratzeko agindu du. Akusatuek, ordea, ukatu egin dute. Ontzia erasotzeko asmorik ez zutela, uretara jausitako lagun baten bila ari zirela esan diote epaileari. Epaileak ez du aintzat hartu bertsio hori, ordea, itsasertzetik oso urrun zeudelako atxilotu zituztenean.
Herbeheretako armadako ontzi batek atzeman zituen ustezko erasotzaileak, eta Espainiako armadako Castilla ontziko eskifaiaren eskuetan utzi zituen. Aurreko asteazkenean eraman zituzten atxilotuak Espainiara.
Joan den urteko maiatzean beste bi pirata somaliar zigortu zituen Espainiako Auzitegi Nazionalak. Alakrana atunontziari eraso egitea egotzita, 439 urteko zigorra jarri zien.
