Zaborra hartzeko prest

Urteetako tirabirak eta hemezortzi hilabetetako lanen ondoren, azkenean ireki ditu ateak Sarrikotapeko Mendixka hondakindegiak (Zuberoa). Lehendabiziko hondakinak jasota, konposta egiten eta balorizatu ezin diren zakarrak metatzen hasiko da hemendik aitzina. Lapurdi ekialdea, Nafarroa Behereko eta Zuberoako 178 herritako hondakinak jasoko ditu; hau da, 75.000 lagunek zaborrontzi arruntera botatakoak.

Proiektuak desadostasunak izan ditu hasieratik, eta orain ere sortu da kalapita, herriko hiru hautetsik dimititu baitute.

Hondakindegia lanean da jada, hala ere. Nicolas Seguin Bil Ta Garbi sindikatuko komunikazio arduradunak azaldu duenez, urtean 20.000 tona zabor biltzeko gai izanen da Mendixka. Horietatik %50 organikoak izanen dira, eta konposta egiteko baliatuko dituzte. Bertze %50 berriz, balorizatu ezineko hondakina izanen dira, eta konpost plantaren ondoan ezarri duten metatze gunean lurperatuko dituzte. Bertzalde, birziklatu daitezkeen hondakinak —kartoia eta edukiontziak, erraterako—, apirilean Baionan irekitako Canopia hondakindegira bideratuko dituzte.

Seguinen arabera, hilabete batez Mendixka hondakindegia teknikoki aztertu ondoren, udazken bukaerarako lehendabiziko konpost multzoa lortzea espero dute. Helburua urtean 4.600 tona konpost lortzea litzateke, eta hartara, ongarri kimikoen erabilera murriztea. Orotara zazpi langilek eginen dute lan hondakindegian.

Auzapeza negoziaziotan

Christian Joncohalsa Sarrikotapeko auzapezak BERRIAri adierazi dionez, ez daki zergatik dimititu duten hiru hautetsiek. Erran du ez dagoela ez proiektuaren alde, ez aurka; Bil Ta Garbirekin negoziaziotan ari dela baizik: «Gaur egun ez gara jada saiatzen hondakindegia oztopatzen, baina ahal dugun guzia atera nahi genuke. Sarrikotapean ditugu hondakinak, baina ez ditugu izan nahi diru kopuru irrigarri baten truke».

Seguinek, berriz, hondakindegia abian jarri izanaren garrantzia nabarmendu du: «Gaur egun badago printzipio bat: hondakinak tratatuak izan behar dira sortu diren lekuan. Baionan eta Sarrikotapean eraikitako egiturei esker, Ipar Euskal Herriko hondakin guziak tratatu ahal izanen ditugu tokian bertan».