Amnistiaren Aldeko Mugimenduak jakinarazi duenez, Andoni Zengotitabengoa euskal presoa egoera larrian dago Portugalgo Monsanto espetxean. 2010ean atxilotu zutenetik dago kartzelan, eta bere egoera salatzeko gose greba hasi zuen larunbatean. "Harekin batera espetxe horretan dauden beste hamar preso politiko ere gose greban daude, oro har oso gogorra delako espetxe horretako egoera", dio AAMk.
Elkartasuna adierazteko, martxa bat egingo dute larunbatean. 09:00etan bilkura egingo dute espetxearen aurrean, eta zuzendariarekin hitz egiten saiatuko dira. 12:30ean Lisboan egingo dute elkarretaratzea. "Andonik bizi duen egoera bidegabea salatu nahi dugu, bakartzeak eta etengabeko umiliazioak jasanezina egiten dutelako haren espetxe egoera", salatu du AAMk. Gainera, Elorrion (Bizkaia) egingo diren mobilizazioetan parte hartzera eta presoari idaztera deitu dute.
