Herrigintzatik eta herrigintzarentzat da 23. Korrikako merchandising produktuak eta arropak diseinatzeaz, ekoizteaz eta saltzeaz arduratu den enpresaren leloa; Koparia du izena, eta Euskalgintzaren Kontseiluak sortu du. Izan ere, salmentekin lortzen dituen irabazi guztiak «euskararen normalizaziora» bideratzen ditu, hizkuntza bizirik mantentzeko asmoz. Euskara babesteaz gainera, etikarekin harreman estua duen beste helburu bat ere badu enpresa horrek: aurtengo lasterketako jantziak eta osagarriak «ahalik eta modu jasangarrienean» ekoiztea.
Hain justu, euskarazko arreta eta baliabide jasangarriak eskaintzen dizkielako aukeratu dute Korrikako sustatzaileek Koparia ekoizle gisa. Hala azaldu zuten Idurre Eskisabel Euskalgintzaren Kontseiluko idazkari nagusiak, Ane Elordi aurtengo Korrikako koordinatzaile nagusiak eta Aize Otaño AEK-ko Artezkaritza Kontseiluko kideak abenduaren 20an, hitzarmenaren berri eman zutenean: «Euskararen alde lanean gabiltzan eragileok frogatu nahi dugu komunitate osoak irabazten duela bakoitzaren indarrak batuz gero».
Hain zuzen ere, ekonomia zirkularrean oinarritutako ekoizpen eta salmenta eredua lantzen du Kopariak; hau da, produktuak sortzeko materialak birziklatzen dituzte, erabilgarri izateari uzten dioten arte. Besteak beste, arropak, osagarriak, zenbait markatako kamisetak, kirol jertseak eta lepokoak egiten dituzte. Horrez gain, «neurrira pentsatutako kalitatezko merchandising eta promozio zerbitzuak» eskaintzen dizkiete Korrikarako sortu dituzten produktuen antzekoak behar dituzten enpresei. Produktuak biltegiratzeaz, banatzeaz eta salmenten kontrolaz ere arduratzen dira.
