Hauteskundeak baino lehen zegoen krisian, hauteskundeetako emaitzen ostean zegoen krisian, eta handik aurrerako guztien ondoren dago gain behera. Bere izenak adierazten duenaren beste muturrera egin du Ezker Batuak azken hilabeteotan.
Eztabaida ez baita Arabako ahaldun nagusia hautatzeko negoziazioetan lanpostuak eta dirusariak negoziatu izana, negoziaketak alderdiaren zuzendaritzaren ezkutuan eta baimenik gabe egin izana baizik. Eztabaida ez baita koordinatzaile nagusiaren jardunak edo alderdiaren barne krisiak hauteskunde emaitza kaskar horietan nola eragin duen aztertzea, koordinatzaile nagusiak Legebiltzarrean aritzeagatik jasotzen duen soldata ez duela alderdiaren diru kutxan sartzen baizik.
Eta aranistak daude, eta madrazistak. Eta zuzendaritza nagusiak, eta kontseilu politikoak. Eta batzar nagusi bat antolatuta azarorako, eta beste bat urrirako. Baina gutxi hitz egiten da jada ideologiaz, mapa politiko berriaz, eta birkokapenez. Eta gutxiago EBri bozka eman ziotenez. Ezkerrekoa eta batua?
Hizpideak
Ezkerrekoa eta batua?
Iruzkinak
Ez dago iruzkinik
Ordenatu
