Euskal Herrian 2028rako egongo da prest minbizi batzuk tratatzeko terapia modernoa: protoi terapia
Protoi terapia erradioterapia teknika berri bat da: fotoiak erradiatu beharrean, protoiak erradiatzen ditu. Donostiako Unibertsitate Ospitalearen ondoan ezartzen ari dira unitatea.
Donostiako Unibertsitate Ospitalearen ondoan egiten ari diren protoi terapiako unitatea aurrera doa. Amaitu dute gantry izeneko ekipoaren instalazioa: 90 tonako pisua duen beso robotikoa. Horixe da protoi terapiaren zentroko ekipamendu teknologiko garrantzitsuenetakoa. 2028aren hasieran jada martxan egongo da minbizi batzuk tratatzeko terapia moderno hori. Ohiko erradioterapiaren aldean, abantaila asko ditu paziente batzuen minbizia tratatzeko.
Protoi terapia erradioterapia teknika berri bat da, partikulak erradiatzen dituena, baina, kasu honetan, fotoiak erabili beharrean, protoiak erabiltzen dituzte. Protoien eta fotoien arteko ezberdintasun nagusia energia askatzeko garaian antzematen da. Fotoiek eta elektroiek sakonera tarte handi batean igortzen dute energia, hasieran batez ere. Protoiei eta bestelako ioi pisutsuagoei dagokienez, berriz, ibilbidearen lehen partean energia gutxi bidaltzen dute, baina puntu jakin batera iristean ia energia guztia askatzen dute sakonera txiki batean. Ondoren, asko murrizten da igortzen duten energia kantitatea, berehala hutsera iritsi arte. Energia gehien askatzen den puntu horri Braggen erpina deitzen zaio, William Lawrence Bragg zientzialari britainiarrari erreferentzia eginez.
Hala, teknika horrekin egindako terapiekin, tumorera iritsi aurreko ehunetan apenas uzten den irradiaziorik, eta energia ia guztia minbizian askatzen da. Gero, erradiazio dosia ia hutsera jaisten da berehala; hala, atzeko ehunek ere ez dute ia erradiaziorik jasotzen.
Tumorearen sakonera
Erradioterapiaren helburua beti da inguruko ehun osasuntsuari ahalik eta gutxien erasotzea, hau da, ahalik eta dosirik handiena kontzentratzea tumorean, eta ahalik eta gutxiena inguruko organo eta ehunetan.
Gaur egun sinplifikatu egin da protoi terapiako unitateak eraikitzeko prozesua, baita merkatu ere, nahiz eta ohiko kanpo erradioterapia zentroak baino askoz konplexuagoa den oraindik. Protoi terapiako makina batek, batez beste, 28 milioi euro balio du.
Jatorrizko artikuluak
-
Instalatu dituzte jada Donostiako protoi terapiaren zentro berriko tresnarik garrantzitsuenak
Iñaut Matauko Rada |
|
-
Protoiak, onkologia iraultzeko?
Iñaut Matauko Rada |
|