4 pertsonarentzako osagaiak:
4 onddo (plantxarako erabiltzen direnak).
Ziazerba sorta bat.
Idiazabalgo gazta zati bat.
Oliba olio birjina.
Maldon gatza.
Piper hauts beltza.
Modena ozpina.
Carpaccioa Italiako errezeta bat dugu, normalean txekor azpizunarekin egiten dena. Gaur beste osagai batekin egingo dugu, sasoi honetan ugari daudenez, prestatzeko beste modu bat eduki dezazuen. Plater hau prestatzeko, ordea, erabiltzen ditugun onddoek erabat sanoak izan behar dute, eta tamaina ertainekoak, ez handiegiak ez eta txikiegiak ere.
• Onddoak garbitu, lehortu, eta ahalik eta xafla finenetan moztu. Ondoren, lau plateratan banatu xaflak, forma borobilean jarriz. Platerean ere lau bat ziazerba hosto gazte ipini.
• Oliba olio birjinaz eta koilara baten laguntzaz, ondo busti onddo guztiak eta ziazerba hostoak. Gatz pittin bat gainetik bota, baita piper hautsa ere: momentuan xehatua bada, hobe. Modena ozpin tanta batzuk ere bota.
• Bukatzeko, Idiazabalgo gaztaren xafla fin-finak ipini guztiaren gainean. Lehen esan dugun errezeta italiarrean, gazta parmesanoa erabiltzen dute. Zuek ere gazta horrekin proba dezakezue nahi izanez gero. Komeni da jateko ordua baino hogei bat minutu lehenago prestatzea, platera gozatzen joan dadin. Eta ogi txigortuarekin batera dastatzea gomendatzen dizuet.
