01/09/11

Izugarrikeriaren marka beti dago nork hautsiko zain, eta brastakoan, gure arrunkerien ispiluaren aurrean geundela, Adan paradisutik bota zutenean baino abailduago sentiarazi gintuen telebistak: nola da posible, zergatik, zer gertatuko da…

Espantu eta galdera asko, baina bakar batek ere ez zuen itauntzen zergatik geneukan paradisuaren monopolioa. Ezin genuen ulertu inork gure zerua infernu bihurtu nahi izatea, hori zen gure arrazonamendu nagusien gailurra, eta ikusi genuenean pilotu haiek paradisua beste munduan gozatzeko saria jaso nahi zutela hemen infernua piztu eta gero, are ulergaitzagoa egin zitzaigun hondamendia. Bitartean, orratz harroak, suaren mende, zibilizazio tzar zaharren hondakinen itxura hartzen ari ziren, eta gure munduaren akabera ote zen xuxurlatzen genion gure baitako izuari.

Halako batean, artean dardarka, lehen hitzak atera zitzaizkigun:

Pelikula bat ematen du.