Fitxategiak

Fitxatuta gaude denok. Zerrenda askotarikoetan fitxatuta. Zerrenda ilegaletan, zerrenda ezkutuetan, zerrenda publikoetan fitxatuta. Guk geuk ere gure zerrendak ditugu; fitxatuta dauzkagu gure intereseko pertsonak, gure etsaiak, gure lagunak.

Gauza bat da fitxategietan gaudela jakitea, eta beste bat zein fitxategitan gauden.

Frantziako Estatua berriro harrapatu egin dute. Jendarmeria berriro erori da zulo berean. Duela gutxi ijito errumaniarrak atzeman eta egozteko barne agindua izan zen bezala, orain ijito frantziar eta atzerritarren fitxategi gorde eta legez kanpokoa aurkitu diote. Duela hainbat urtetatik gizendu duen artxibategia. Frantziako eta Europako araudien arabera legez kanpokoa, besteak beste gutxiengoei erasotzen dielako.

Zein fitxategitan eta zertarako egindako fitxategitan gaude gu?