Merezi izan du

San Marko mankomunitatea EAJren, PSEren eta Hamaikabaten esku dago atzotik. Hondakinen kudeaketa zama eta buruhauste izateari utzita negozio bihurtu denean, ezin zen geratu ezkerreko politikak bultzatzen zituztenen esku. Hori gertatu da, ez besterik.

Hondakinen gaikako bilketa, konpostatzea, atez ateko sistema... mehatxu larria ziren dena sutan erre eta dirua egin nahi dutenentzat, kostu humano eta ekologikoak gorabehera.

Baina ezkerreko ikuspegitik, ez dago porrotzat hartzerik oraingo egoera. Hiru urte nahikoa izan dira bestelako eredu bat martxan jartzeko, hura probatzeko eta haren balio handia erakusteko. Atez ateko sistema martxan jarri dutenek globaletik lokalera pentsatu eta lokaletik globalera erantzun dute, emaitza ikusgarriekin. Hori ezingo dute erre errauste plantan. Etorkizuneko biderako mugarri gisa geratu da.