Batzuetan birikak puzten dituzu gehiago, iduri luke badutela gibeleko erreserba-gela. Orduan ohartzen zara arnasten ari zarela, ematen du halako bake-aire bat giroari. Halaxe harrapatu dut ene burua, alabari irakurtzean Pantxo zezenak kausitzen duela jendeen atzaparretatik libratzen, zezen-plazatik jauzi eginez eta hiriko karriketan barrena galduz. Pello Añorgak idatzi eta Jokin Mitxelenak ilustratu duten liburua heldu zaigu etxerat Haria-harpidetzari esker.
Eguna ipuin horrekin bukatu badut, bertze honekin hurrengoa hasi: goizean goiz zezen-kumeak ihes egin duela Donibane Garaziko hiltegitik. Irratiak oihu egiten du, behin eta berriz: «Karriketan badabil aratxea, kasu eman ezazue. Azkenik ikusia izan da Jai-Alaiko biribilgunean. Bistaratzen baduzue, otoi, deitu hona, hemen baitira laborariak beha». Hondarrean, oren batzuen buruko atzemana izan da; non eta Donibane Garaziko hiletxeko baratzean. «Nahi zuen jendea bildu, gaizoak, omenaldia», bota dit adiskideak. Hiltegitik, hiletxerat, Pantxo dei dezakegun aratxeak, bizia luzatu dio bere buruari, asteartera arte, gutienez bai.